खोटाङको साकेला गाउँपालिकाले विभिन्न कार्यक्रमको आयोजना गरेर मार्च ८ अर्थात ११४ औं ‘अन्तर्राष्ट्रिय महिला दिवस’ मनाएको छ । यस वर्ष ‘महिलामा लगानी- सभ्य र समुन्नत समाजको थालनी’ भन्ने नाराका साथ गाउँपालिका अध्यक्ष रवि प्रकाश राईको प्रमुख आथित्यता र गाउँपालिका उपाध्यक्ष बिर्सिका राईको अध्यक्षतामा महिला तथा बालबालिका शाखाको संयोजनमा विभिन्न कार्यक्रम गरि महिला दिवस मनाईएको हो । महिला दिवसको अवसरमा साकेला गाउँपालिकाले पहिलो पल्ट ८० वर्ष उमेर पुरा भएका जेष्ठ महिलाहरुलाई दोसल्ला ओढाएर सम्मान गरेको छ । वृद्ध अवस्थाका जेष्ठ महिलाहरुले समाज परिवर्तनका लागि खेल्नुभएको भूमिका र योगदानको उच्च मूल्याङ्कन गर्दै यस वर्ष गाउँपालिकाका पाँच वटै वडाका जेष्ठ महिलाहरुलाई सम्मान गरिएको हो ।